Gjykata e Posaçme ka dënuar me 1 vit burg ish kryebashkiaken e Libohovës, Luiza Mandi, për veprën penale të shpërdorimit të detyrës.
Ish-kryebashkiakia e cila vijon të jetë në kërkim ka kërkuar gjykim të shkurtuar, që i është miratuar. Përfundimisht ajo do të vuajë vetëm 8 muaj burg.
Po ashtu një tjetër kërkesë e depozituar është që dënimi i saj të konvertohet në shërbim prove, gjë për të cilën nuk është pranuar. Hetimi ndaj saj erdhi pas një kallëzimi të berë nga një qytetar, i cili pretendonte se në pronat e familjarëve të tij bashkia po zhvillon një projekt zgjerimi rruge.
Duke u njohur me këtë fakt, qytetari ka kontaktuar vetë me kryetaren e Bashkisë dhe përgjegjësin e Urbanistikës, ku e kanë sqaruar se pas përfundimit të projektit do të merreshin me riparimin e dëmeve të shkaktuara në tokat e tij, si dhe duke pastruar dherat dhe inertet që ishin hedhur.
Por gjatë përfundimit të punimeve prej kompanisë “Alba Konstruksion”, denoncuesi ka konstatuar se muri rrethues nuk ishte ndërtuar në cilësinë e duhur, por ishte shtrirë edhe në sipërfaqe të tjera të tokave në pronësi të tij.
Në këto kushte, Prokuroria e Posaçme ka nisur punën në terren ku ka sekuestruar projektin në fjalë dhe është konstatuar se ishte cënuar prona e familjes nga Libohova.
Sipas shkresave, gjatë zhvillimit të projektit në fjalë nuk është zbatuar procedura e shpronësimit, çka ka sjellë dhe dëmin ekonomik të kallëzuesit, në një vlerë prej 362,480 lek.
