Pas burgosjes së deputetit Ervin Salianji, Partia Demokratike do të mbledhë sot Këshillin Kombëtar ku pritet të miratohet nisja e protestave në të gjithë vendin.
Në mbledhjen e cila do nisë në orën 18:00 pritet që kryetari i Partisë Demokratike Sali Berisha do të sqarojë aksionin politik të opozitës duke miratuar datën 6 tetor si datën e nisjes së protestave.
Protesta të cilat sipas opozitës nuk do te ndalojnë deri në largimin e kryeministrit Edi Rama dhe ngritjen e një qeverie teknike që do të çojë vendin drejt zgjedhjeve parlamentare.
Aksioni i opozitës me protesta në rruge pritet të shoqërohet edhe me protesta në parlament, pasi deputetët kanë vendosur që të mos lejojnë zhvillimin normal të mbledhjeve të kuvendit si dhe të shkëpusin marrëdhëniet institucionale me mazhorancën.
Caktimi i datës per nisjen e protestave erdhi pasi Gjykata e Apelit dënoi me nje vit burg deputetin Ervin Salianji për kallëzim të rremë. Opozita e ka cilësuar vendim politik dënimin me burgim të Salianjit, i cili tashmë ndodhet në burgun e Fierit, ku pritet të vuajë dënimin e caktuar nga Gjykata e Apelit.
