Pesë ditë pas përfundimit të garës për përzgjedhjen e kreut të Policisë së Shtetit, ministri i Brendshëm Ervin Hoxha ka deklaruar se do i propozojë këtë të hënë kryeministrit Rama dhe Këshillit të Ministrave emrin e drejtorit të ri.
Në një deklaratë për mediat, Hoxha ka theksuar se Ministria e Brendshme do të publikojë sot renditjen e kandidatëve për Drejtorin e Policisë në faqen zyrtare të saj.
Në një deklaratë për mediat, teksa foli për procesin, Hoxha shpjegoi se emrat e kandidatëve do publikohen sipas pikëzimit.
“Ky proces ishte shumë konkurrues në bazë të meritave dhe të integritetit, i monitoruar nga 2 misionet që asistojnë Policinë e Shtetit. Sot, Ministria e Brendshme do të publikojë renditjen në faqen e saj zyrtare dhe unë do i përcjell Kryeministrit, Këshillit të Ministrave kandidaturën për Drejtor të Përgjithshëm”, – tha Hoxha.
Sipas burimeve, për shkak të agjendës së kryeministrit jashtë vendit, ende emri nuk është dërguar zyrtarisht.
Kandidatët potencialë për të marrë drejtimin e Policisë së Shtetit janë: Ilir Proda, Neritan Nallbati, Skënder Hitaj dhe Altin Mena.
Në garën për postin e Drejtorit të Policisë së Shtetit aplikuan 15 kandidatë, por 4 prej tyre, konkretisht: Shemsi Premçi, Ibrahim Disha, Hajrulla Xhivini dhe Sami Rasha, u përjashtuan, pasi sipas ministrit të Brendshëm nuk plotësonin kriteret sipas ligjit të ri për patsërtinë e figurës.
KANDIDATËT
* Adriatik Tafçiu
* Altin Mena
* Ardian Çipa
* Gentjan Shehaj
* Idajet Faskaj
* Ilir Proda
* Lutfi Minxhozi
* Neritan Nallbati
* Pëllumb Seferi
* Rebani Jaupi
* Skënder Hita
