Paraditen e sotme banorët e Hoxharës së re në Fier janë ngritur në protestë prej mungesës së ujit të pijshëm.
Banorët shprehen të indinjuar se përgjatë gjithë verës kanë pasur vetëm 30 minuta ujë në ditë, një situatë kjo aspak e pranueshme në këto temperatura përvëluese.
Gjithashtu, një nga qytetaret tha se ujësjellësi në Fier është bërë si mafie, punësohen njerëz dhe në fund askush nuk vjen për të zgjidhur problemin.
Ndërkohë një tjetër tha se ujit i vjen era fekale, pasi është përzier me ujërat e zeza.
Ata theksojnë se kjo është situatë e përsëritur dhe absurde pasi kanë qenë taksapagues të rregullt pavarësisht se furnizohen vetëm gjysmë ore ujë në ditë.
Ata i bëjnë thirrje institucioneve përgjegjëse që të marrin masa të menjëhershme, në të kundërt do të përshkallëzojnë protestat.
