Në një deklaratë pas mbledhjes që qeverisë, ministri i Financave, Petrit Malaj, njoftoi se Këshilli i Ministrave ka rishikuar për herë të dytë buxhetin e shtetit, duke rritur me 27 miliardë lekë pritshmëritë për të ardhurat.
“Si rezultat i performancës pozitive të ekonomisë kemi rishikuar buxhetin e vitit 2024, duke rritur të ardhurat për këtë vit në vlerën 27 miliardë lekë. Këto shtesa janë menduar të shpërndahen në sektorët që kanë ndikim të lartë në jetën sociale dhe ato që kontribuojnë në zhvillimin ekonomik. Kemi rritur financimet shtesë për Ministrinë e Bujqësisë me 500 milionë lekë për skemën e granteve të fermerëve.
Kemi rritur 200 milionë lekë për Ministrinë e Shëndetësisë dhe për Ministrinë e Brendshme me 1.3 miliardë lekë për kompensimin ushqimor të policëve, krahas orëve shtesë të punës. Për Ministrinë e Arsimit 300 milionë lekë për shpërblimin e sportistëve që kanë arritur rezultate të mira. Kemi rritur financimet dhe për Ujësjellës Kanalizimet me 2 miliardë lekë”, tha Malaj.
