Tek sa diskutohej në Komisionin për Çështjet Ligjore, deputeti i Partisë Socialiste Pandeli Majko ka reaguar dhe ironizuar kryeministrin e vendit Edi Rama dhe rivalin e tij Sali Berisha, për projektin e tyre në ‘ podcast ‘, duke komunikuar me qytetarët.
Majko shtroi pyetjen drejtuar AMA-s nëse këto podcast do të rregullohen me ligjin e ri të medias audio-vizive.
Deputeti Majko u shpreh se ka ardhur koha që të diskutohet mbi hapësirën e ridimensionuar të tregut, duke marrë parasysh hovin e madh që kanë marrë hapësirat online.
“Unë e kam pyetjen për përfaqësuesit e AMA-s. Pyetja mund të tingëllojë si ironi, por ndryshimet që vijnë sot kanë të bëjnë me ofruesit e shërbimeve të mediave audio-vizive Këto podcast që po dëgjojmë.
Rama do të krijojë një podcast të vetin edhe zoti Berisha po ashtu. Këto janë të rregulluara nga ky ligj? Janë nën rregulloren e këtij legjislacioni që po diskutojmë sot?
Kam përshtypjen se influenca e rrjeteve sociale po krijon disa zona të lira të ashtëquajtura ekonomike dhe këtu po diskutojmë për të kontrolluar disa mediave të licensuara në një kohë që tregu i medias është ridimensionuar. A ka fuqi AMA të ndërhyjë, apo duhen rregulla ligjore? Pyetja ime është a është e rregulluar kjo?”- tha Majko.
