Partia Socialiste ka çuar përpara projektin e saj duke ngritur komisionin parlamentar të censurës. Konkretisht, mazhoranca ka propozuar emrat e 6 anëtarëve socialistë që do të jenë pjesë e komisionit të posaçëm për dezinformim.
Besimin për ta drejtuar këtë komision që synon t’iu mbyllë gojën mediave, socialistët ia dhanë Erion Braçes, ndërsa 5 anëtarët e tjerë do të jenë emra të rëndësishëm, disa prej të cilëve ish ministra, si Bledi Çuçi, Mimi Kodheli, Pandeli Majko, Enslemvera Zake dhe Etilda Gjonaj. Nga 11 anëtarë të komisionit opozitës do t’i takojnë 5, ndërsa deri tani kanë konfirmuar pjesëmarrjen Mesila Doda nga Grupi për Demokraci dhe Integrim, dhe Fatmir Mediu i “Aleancës për ndryshim”.
Nga grupi i Rithemelimit, Gazment Bardhi kërkoi kohë kur socialistët e kaluan në Kuvend, ndërsa emrat e 3 përfaqësuesve të grupit të tij Parlamentar ende nuk i ka gati.
Kohën Rithemelimi e kërkoi që të hiqej çdo dilemë nëse komisioni do të kishte hapësira për ndërhyrje apo jo në lirinë e medias. Komisioni i Posaçëm për Dezinformim do të ketë një afat 1-vjeçar me fokus koordinimin dhe mbikëqyrjen e të gjitha përpjekjeve institucionale për të luftuar dezinformimin dhe format e tjera të ndërhyrjes së huaj në proceset demokratike në Shqipëri. Po ashtu, Komisioni do të skanojnë mediat, institucionet, partitë politike, bizneset dhe gjithçka tjetër që ka lidhje me rusët. Po ashtu do përdoret financimi rus dhe për të goditur kundërshtarin.
“Komisioni ka objekt të veprimtarisë së tij: Të nxitë identifikimin e ndërhyrjes së huaj në proceset demokratike përmes një sërë formash, duke përfshirë fushat e dezinformimit nëpërmjet medieve tradicionale dhe atyre sociale për formëzimin e opinionit publik, mbështetjen financiare të drejtpërdrejtë dhe të tërthortë, si dhe ndikimin keqdashës ekonomik të aktorëve publikë dhe minimin e veprimtarisë së shoqërisë civile; Të kryejë një analizë të plotë të të gjithë faktorëve dhe fenomeneve për të vlerësuar nëse janë respektuar detyrimet ligjore në fuqi në lidhje me transparencën në proceset demokratike, veçanërisht transparencën e financimeve në fushata zgjedhore, si dhe transparencën e financimit të të gjithë aktorëve dhe platformave që ofrojnë shërbime në sektorin e informimit publik apo veprimtari të tjera të ngjashme me to”, thekson ndër të tjera drafti i PS për Komisionin e Dezinformimit.
