Çmimi i naftës ka bërë mrekulli këto ditë në bursat amerikane dhe europiane, por komplet e kundërta ndodh me tregun shqiptar.
Në bursën amerikane një fuçi nafte e papërpunuar tregëtohet me çmimin rreth 72 dollarë për fuçi, po ashtu edhe në Europë nafta ka pësuar një ulje të lehtë.
Ndërsa tregu shqiptar mbetet në top 20-n më të shtrenjtë në botë për nivelin e karburanteve.
SHBA i uli çmimet e naftës pasi investitorët shqetësohen për mungesën e progresit në negociatat midis demokratëve dhe republikanëve në Uashington për të rritur tavanin e borxhit.
Gjithashtu Presidenti Joe Biden si dhe kryetari i Dhomës së Përfaqësueve, Kevin McCarthy arritën në një marrëveshje paraprake mbi borxhin e fundjavës, gjithsesi ajo duhet të marrë miratimin e Kongresit i cili deri më tani mbetet i përçarë.
Kjo marrëveshje duhet të arrihet përpara 5 qershorit, ditë në të cilën Departamenti i Thesarit thotë se vendi nuk do të jetë në gjendje të përmbushë detyrimet e tij financiare.
Edhe pse luhatjet në çmim janë të vogla, ato ndikojnë edhe në tregun shqiptar të karburanteve, ku një litër naftë në pompë shitet me çmimin 176 lekë për litër.
Por në raport me verën e kaluar, kur një litër naftë tregëtohej me 220 lekë për litër, çmimi duket të jetë disi i qëndrueshëm, edhe pse Shqipëria renditet në top listën e 20 vendeve më të shtrenjta.
