Gjykata e Fierit ka caktuar masën e sigurisë “arrest me burg” për dy kushërinjtë, Florjan dhe Klajdi Muka, të cilët akuzohen për vrasjen e 19-vjeçarit Grei Bihuci. Dy të rinjtë, njëri 18 dhe tjetri 17-vjeç kanë treguar se viktima nuk ka patur lidhje me sherrin ku ata ishin të përfshirë.
Ata thonë se sherri ka nisur që në muajin dhjetor për shkak të një thike. Florjan Muka ka treguar se në dhjetor, i ka dhënë Auron Çelës një thikë, por ai s’ia ka kthyer në kohë dhe që nga ky moment kanë nisur sherret.
Sipas tij me datë 10 mars, do takohej me Auron Çelën për t’u sqaruar, por aty kishin bërë një sherr dhe për këtë aryse janë takuar sërish të hënën më datë 11 mars. Në këtë ditë, Florjani kishte marrë me vete kushëririn e tij Klajdin, ndërsa Auron Çela kishte me vete Nebil Alimadhin, Olsi Serjanajn, Grei Bihucin (viktima) dhe një djalë tjetër, të paidentifikuar.
Sipas deklarimeve në prokurori, Nebiu ka qëlluar me grusht Florjanin dhe më pas ka nisur një konflikt fizik. Sipas Mukës grupi i Çelës në të cilin ndodhej edhe viktima e ka sulmuar atë dhe kushëririn e tij. Për këtë arsye Muka ka nxjerrë thikën dhe e ka drejtuar nga të rinjtë duke qëlluar Grei Bihucin, por pa ditur siç thote ai, se do ta vriste.
Me pas thotë Muka “jam larguar me vrap poshtë urës dhe kam ndaluar kur dëgjova sirenat e policisë”.
Dy kushërinjtë Muka akuzohen për vrasje me paramendim në rrethana cilësuese në bashkëpunim dhe do dërgohen njëri në burgun e Kavajës, për të miturit, dhe tjetri në burgun e Fierit.
