Disa ditë pas mbledhjes së Kryesisë së Partisë Demokratike, kreu i Grupit Parlamentar Gazment Bardhi ka njoftuar kolegët e tij deputetë.
Bardhi ka njoftuar kolegët për mbledhjen e grupit parlamentar, nesër, ditën e hënë në sallën e grupit te Kryesia e Kuvendit. Mbledhja pritet të nisë rreth orës 13:00.
“Nesër, e hënë, ora 13:00 do të zhvillojmë mbledhjen e Grupit Parlamentar, tek salla e grupit në Kryesinë e Kuvendit”, thuhet në njoftimin e Bardhit për deputetët e PD.
Gjithashtu kujtojmë se në mbledhjen e 6 qershorit që zgjati deri në orët e para të mëngjesit të datës 7, kryesia e PD vendosi të mbajë zgjedhje më 29 korrik për kryetarin e ri të PD-së, duke dalë kundër platformës së propozuar nga grupi i deputetëve, të cilët kërkuan fillimisht riorganizimin duke nisur nga hapja e partisë dhe certifikimi i anëtarësisë aktuale, me zgjedhjet në seksione e degë dhe në Bardhi kërkoi zbatimin e Statutit të partisë, që është mbledhja e Këshillit Kombëtar, si organi i cili duhet të miratojë vendimin e Kryesisë.
Pasi Kryesia të marrë vendimin për mbajtjen e zgjedhjeve për kryetar, është Këshilli Kombëtar ai i cili miraton vendimet e marra. Por shumica e Kryesisë që votuan pro 29 korrikut, nuk kërkojnë mbledhjen e Këshillit Kombëtar, por kërkojnë që organizimin e zgjedhjeve ta kryejë vetë ky forum.
Sipas statutit thuhet se vendimet e rëndësishme të partisë duhet të miratohen nga Këshilli Kombëtar. E po ashtu është Këshilli Kombëtar ai i cili miraton Komisionin Zgjedhor që do të merret me menaxhimin e zgjedhjeve në parti. Neni 53 i Statutit thotë se anëtare të këtij komisioni propozohen nga Kryetari i PDSH-së, emërohen nga Kryesia dhe miratohen nga Këshilli Kombëtar.
