Ditën e sotme do të mbahet mbledhja mes dy qeverive, Shqipëri-Mal i Zi, ku pritet të nënshkruhen 9 marrëveshje në fusha të ndryshme. Mësohet se takimi do të mbahet në Akademinë e Shkencave e Arteve në Podgoricë.
Takimi pritet të nis pas pak orësh, në orën 10:30 ku do të bëhet prezantimi I dy delegacioneve dhe në orën 11:45 nis seanca e përbashkët ku do të zgjas deri në pasdite.
Siç është thënë dhe në agjendë, në orën 13:00 do nënshkruhet Deklarata e Përbashkët dhe Marrëveshja Bilaterale për ndërtimin e urës Buna si dhe do të nënshkruhet edhe marrëveshja që do t’i hapë rrugë ndërtimit të pikës së re kufitare mes Shqipërisë dhe Malit të Zi.
Konkretisht, pritet të nënshkruhen nëntë marrëveshje dhe memorandume në fushat e energjisë, peshkimit, mbrojtjes së bimëve, mbrojtjes sociale, sportit, kulturës dhe medias, mbrojtjes, shëndetësisë, si dhe Marrëveshja për hapjen e kufirit të përbashkët në kalimin Shën Nikollë-Pulaj në territorin e Shqipërisë.
Pas nënshkrimit të marrëveshjeve ndërshtetërore, kryeministrat Edi Rama dhe Dritan Abazoviç do të mbajnë një konferencë të përbashkët për shtyp.
