Të tjera detaje kanë dalë në dritë nga ngjarja e rëndë e ndodhur në qytetin e Korçës, ku 61-vjeçari, Illo Lluka, qëlloi për vdekje 40-vjeçarin Emiljano Pine dhe më pas vrau veten.
Një ditë pas vrasjes, fqinjët e Pines kanë treguar momentin e ngjarjes. Një prej tyre është shprehur se Emiljano ishte djalë i shkëlqyer dhe se nëna e tij prej shumë vitesh mbante në shtëpi dhe kujdesej për babain e Ilo Llukës.
“Isha në shtëpi kur ndodhi ngjarja. Dëgjova krisma, dola jashtë dhe i pashë të dy të shtrirë në rrugë. I njihja të dy personat. Emiljano ishte djalë i shkëlqyer. Nëna e Emiljanos e mbante në shtëpi babain e Ilos prej disa vitesh dhe kujdesej për të, që kur ishte edhe i shoqi gjallë”, ka thënë ai.
Siç raportuam dhe mbrëmjen e djeshme pista kryesore e hetimeve mbetet trashëgimia e një apartamenti në pronësi të babait të autorit të ngjarjes, i cili donte që t’ja linte trashëgimi 40 vjeçarit, Emiljano Pine, djalit të kujdestares.
Ilo Lluka prej shumë vitesh jetonte në Greqi. Pas vendimit të së atit për t’i lënë banesën trashëgimi djalit të kujdestares, 61-vjeçari nuk e pranoi këtë fakt dhe u kthye në qytetin e Korçës ku dhe kreu aktin makabër. Ai njihet nga banorët e zonës si përdorues i pijëve alkoolike, ndërkohë deri më tani nuk është konfirmuar ende nëse në momentin e ngjarjes Ilo Lluka ishte nën efektin e alkoolit apo jo
