Kreu i PD-së Lulzim Basha ka reaguar në median sociale X në lidhje me deklaratat e Ramës që e cilësoi si të pakuptimtë seancën e djeshme në OKB, Kosovë-Serbi.
Basha shprehet se Rama flet si perëndimor, por vepron si lindor.
Basha shton se kemi të bëjmë me një cënim të sigurisë kombëtare të cilësuar të tillë edhe nga aleatët strategjikë, por vetëm Rama nuk e konsideron të tillë.
Reagim i Bashës në X
Flet si perëndimor, vepron si lindor. Aleatët strategjikë e trajtojnë sigurinë e Kosovës si çështje të sigurisë kombëtare, rajonale, europiane dhe euroatlantike. Vetëm Edi Rama nuk e konsideron të tillë. Aleatët strategjikë e trajtojnë korrupsionin e politikanëve dhe zyrtarëve të lartë në Shqipëri si cënim të sigurisë së tyre kombëtare. Vetëm Edi Rama nuk e konsideron çështje të sigurisë së vendit tonë. Kosova nuk ka nevojë për leksione demokracie nga një autokrat, por për mbështetje konkrete. Shqipëria nuk ka kërcënim më të madh ndaj sigurisë së saj kombëtare se korrupsioni që vret vende pune, varfëron shqiptarët dhe shkatërron besimin te institucionet dhe shteti.
