Autoriteti Rrugor Shqiptar, ARRSH për mes një njoftimi në rrjetin social “Facebook” ka njoftuar në lidhje me situatën pas ndryshimit të motit në vend ndërsa bora gjatë natës ka bllokuar disa rrugë.
Sipas njoftimit nga ARRSH intensiteti i borës ka qenë mesatar në zonat Korçë-Dardhë, në Tamarë-Vermosh, në Qafë Thore-Bogë dhe në Valbonë ndërsa grupet e punës kanë qenë pa ndërprerje në punë për pastrimin e akseve. Më tej në njoftim bëhet me dije se qarkullimi vijon pa probleme ndërsa ARRSH ka bërë thirrje për drejtuesit e mjeteve që të pajisen me goma dimërore dhe zinxhirë si dhe udhëtojnë me shpejtësi të ulët.
Reshje dëbore janë regjistruar gjatë natës në Malësinë e Krujës, kryesisht në lartësitë e parkut Kombëtar të Qafë-Shtamës dhe të Malit me Gropa.
Trashësia e dëborës shkon në rreth 15 cm. Aktualisht nuk raportohet për problematika apo rrugë të bllokuara në këto zona, ndërkohë që reshjet kanë pushuar.
