Presidenti I Republikës së Shqipërisë Bajram Begaj I ka bërë ftesë Presidentit të Republikës së Estonisë Alar Karis, që të vizitojë Shqipërinë në datat 7-9 qershor.
Kjo do të jetë një ngjarje historike për të dy palët, pasi për Presidentin estonez do të jetë hera e parë zyrtare që do të vizitojë shqipërinë.
Sipas axhendës së vizitës, pas ceremonive të mirëseardhjes, që do të zhvillohen më 7 qershor 2023, ora 15:00, në Institucionin e Presidentit të Republikës, të dy Presidentët do të zhvillojnë një takim kokë më kokë e më pas do të kryesojnë delegacionet zyrtare në një takim të zgjeruar. Në fund të takimeve, të dy Presidentët do të kenë dhe një dalje të përbashkët për mediat.
Në qendër të bisedimeve do të jenë nevoja e nxitjes së mëtejshme të marrëdhënieve dypalëshe, veçanërisht në çështjet e bashkëpunimit ekonomik dhe qeverisjes elektronike, por edhe zhvillimet në rajonin e Ballkanit Perëndimor, integrimi evropian i Shqipërisë dhe i vendeve të këtij rajoni, si dhe ndikimi i agresionit ushtarak rus në Ukrainë, për Estoninë dhe rajonin e vendeve Balltike por edhe të Ballkanit Perëndimor.
Më 9 qershor, të dy Presidentët do të ndjekin një stërvitje të përbashkët kibernetike të ekspertëve nga Estonia, Shqipëria, Mali i Zi dhe Maqedonia e Veriut.
Në kuadër të kësaj vizite, Presidenti i Estonisë gjithashtu do të takohet edhe me autoritetet e tjera të larta shqiptare, si dhe do të vizitojë edhe qytetin e Beratit.
