Kryekomisioneri i KQZ Ilirjan Celibashi ka bërë një thirrje për të gjitha KZAZ-të që vijojnë numërimin e votave për Këshillat Bashkiakë.
Me anë të një postimi në rrjetet sociale, Celibashi thotë se KZAZ-të duhet të vijojnë pa ndërprerje procesin e numërimit të kutive të votimit për Këshillin e Bashkisë.
Sipas tij, KZAZ-të duhet ta përfundojnë sot (e marte) brenda orës 16:00 procesin e numërimit të votave për Këshillin e Bashkisë.
“KZAZ-të duhet të vijojnë pa ndërprerje procesin e numërimit të kutive të votimit për Këshillin e Bashkisë. Urdhri 74, dt. 15.5.2023 i Komisionerit dikton që KZAZ-të të marrin masa organizative për ta rifilluar atë jo më vonë se ora 7:00 e datës 16 maj 2023 dhe ta përfundojnë atë, jo më vonë se ora 16:00 e po kësaj date.
KZAZ-të duhet ta përfundojnë sot brenda orës 16:00 procesin e numërimit të votave për Këshillin e Bashkisë”, tha Celibashi.
