Një 20-vjeçar shqiptar ka humbur jetën në Greqi pas një sherri ku janë përfshirë 5 persona.
Mediat greke raportojnë se 20-vjeçari shqiptar Orgito Lloci ka patur një debat të ashpër me dy 24-vjeçarë grekë para se të rrëzohej dhe të përfundonte në spital, ku humbi jetën. Në sherrin e ndodhur në Kalyves Apokoronou kanë qenë të pranishëm edhe tre persona nga Gjeorgjia, Bullgaria dhe Rumania.
Pesë personat e përfshirë në sherr janë ndaluar dhe akuzohen për shkaktimin e plagëve fizike, ndërsa në varësi të rezultateve të autopsisë nuk përjashtohet mundësia që të akuzohen edhe për vrasje.
Policia thotë se ende nuk është e qartë se çfarë ka ndodhur saktësisht. Hetimi është në vazhdim për të përcaktuar se çfarë ka bërë secili nga pesë personat që dyshohet se janë përfshirë në incident.
I riu shqiptar që ka humbur jetën punonte si vrojtues plazhi, por nuk dihet për çfarë ka debatuar me 5 të rinjtë e ndaluar.
