Seanca e ditës së sotme në Komisionin e Shëndetësisë është shoqëruar me debate të ashpra.
Deputetja e PD, Albana Vokshi, është përplasur me kolegët e saj të mazhorancës gjatë diskutimit për çështjen e Onkologjikut.
Vokshi deklaroi se është ndërhyrë në sistem për të ndërruar datat e skadencës së ilaçeve të ndryshme.
Ajo tha ndër të tjera se Onkologjiku është vetëm maja e ajsbergut, pasi ka skandale që ende nuk janë bërë publike.
“Onkologjiku është vetëm maja e ajsbergut. Ju mashtroni duke thënë se nuk ka mungesë të jodit, por ka 6 muaj që mungon. Si nuk e pranoni ju këtë? A mendoni për ato nëna që çojnë fëmijët aty dhe nuk kanë barna? A keni të paktën ndërgjegjen e nënës? Ka skandale që akoma nuk kanë dalë. Çfarë bëhet me pacientët që nuk kanë mundësi të bëjnë terapinë përkatëse nga mungesa e jodit? Ministrja duhet të kishte dhënë dorëheqjen, nuk duhet të ishte këtu fare.
Është e patolerueshme që fëmija të ketë nevojë për medikamente për leuçeminë dhe shteti mos ia sigurojë. A ka barbari më të madhe?
Nëse ndërhyni në sistem për të ndërruar datat e skadencës, ky është skandal. Kushdo që e ka urdhëruar këtë, sepse unë kam informacion që këtë e ka bërë ish-drejtoresha Albana Fico, duhet të mbajë përgjegjësi”, theksoi Vokshi.
Pjesë nga debati:
Albana Vokshi: A ka sasi të skaduara tani që ne flasim në QSUT? Cila farmaci e ka në ngarkim dhe a keni ndërhyrë ju në sistem për të hequr datën e skadencës që ka qenë 31 dhjetor i këtij medikamenti për ta rifutur prapë në sistem? Nëse ju ndërhyni në sistem për të hequr datat e skandencës, ky do të ishte një skandal dhe kushdo që e ka urdhëruar, në informacionin që unë kam e ka bërë ish-drejtoresha e QSUT, Albana Fico, e ka urdhëruar personalisht ajo vetë heqjen e datës së skadencës, duhet të shkojë para drejtësisë kushdo që e ka bërë. Është kriminale, por unë do t’ua vërtetoj, po pyes ministren
Ndërhyn Ilirian Pendavinji
Po qetësohu, ulu. Se është skandal kjo që po them.
Ilirian Pendavinji: Duhet të thuash ku e ke marrë informacionin
Albana Vokshi: Po pyes ministren se ajo duhet ta kontrollojë. Në vend që t’i thuash ministres çfarë po bën më thua mua që mos fol. Hesht, mos u bëni mbrojtës të këtyre skandaleve kriminale dhe më lër të flas.
Ndërhyn: Kërkoni ndjesë
Albana Vokshi: Kjo që thashë është skandal nëse është e vërtetë. Ka edhe më shumë, por ju i fshini! Hesht pra!
Ilir Metaj: Kërko ndjesë
Albana Vokshi: Është turp të bëheni mbrojtës të këtij korrupsioni dhe abuzimi skandaloz. Unë them është ndërhyrë në sistem për të hequr datën e skandencës
Ilir Metaj: Mashtrove
Albana Vokshi: Nuk kam mashtruar! Ose nxirre përjashta, ose heqi të drejtën e fjalës. A jeni prindër
Ilir Metaj: Lëri etikën, por mos mashtro
Ndërhyn maxhoranca
Albana Vokshi: Do t’ua tregoj ndotjen akustike, prisni. Morën urdhrin për të bërë zhurmë. Ministrja duhet të kishte dhënë dorëheqjen, s’duhet të ishte këtu.
A keni ju rifutur në sistem një sasi prej 1137 flakonë duke hequr datën e skadencës?
Mbani shënim se ka edhe skandale të tjera
Ilir Metaj: Po përhap panik
Albana Vokshi: Mbaj përgjegjësi. Nuk më bëni do të hesht (U drejtohet maxhorancës) Këto po mbjellin vdekjen.
