Tingëllon çuditshëm dhe tepër qesharake por Qumështi i gomaricës mund të tingëllojë si një risi në tregun e llojeve të ndryshme të qumështit. E ndërsa në realitet, ky produkt ka ekzistuar prej mijëra vjetësh. Megjithatë, vitet e fundit qumështi i gomaricës është bërë mjaft i njohur, veçanërisht në disa zona të Evropës.
Qumështi i gomaricës ka shumë benefite, gjen hapësira të ndryshmë përdorimi jo vetëm për konsum dhe për efektet pozitive në organizëm por edhe për sektorin e farmaceutikës dhe kozmetikës. Gomaricat i përkasin familjes Equidae e cila gjithashtu përfshin kuajt dhe zebrat.
Raca të ndryshme të gomaricave të shtëpisë rriten e mbarështrohen në të gjithë botën dhe si shumë gjitarë të tjerë, edhe gomaricat janë rritur prej shekujsh për të marrë prej tyre qumështin. Qumështi i gomaricës ka një histori të gjatë përdorimi në fushën medicinale dhe të kozmetikës.
Gjithashtu thuhet se Hipokrati e përdori atë si trajtim për artritin, kollën dhe plagë të ndryshme, ndërsa Kleopatra besohet se e ka pëdorur për të ruajtur freskinë e lëkurës dhe butësinë e saj në banjat me qumësht gomarice. Ka veti antimikrobike dhe përdoret si trajtim në mjekësinë popullore për infeksione, përfshirë edhe kollën e mirë ndërsa është përdorur gjithashtu edhe në trajtimin e disa viruseve në zona të Afrikës dhe Indisë.
Por krahasuar me qumështin e kafshëve të tjera që prodhojnë këtë produkt si lopët, dhitë, delet, bualli apo devetë, qumështi i gomaricës ngjan më tepër me qumështin e gjirit tek njeriu dhe në fakt, për herë të parë është përdorur në shekullin e 19-të për të ushqyer një foshnjë jetime. Edhe fermat e gomerëve/gomaricave po bëhen gjithnjë e më tepër popullore.
Ndërsa nga ana ushqimore, qumështi i gomaricës është shumë i ngjashëm me qumështin e gjirit të gruas dhe atë të lopës. Ai siguron vitamina dhe minerale së bashku me proteina. Ka më pak yndyrna dhe kalori dhe ka më shumë vitaminë D sesa qumështet e tjera. Shumica e kalorive në qumështin e gomaricës vijnë nga karbohidratet, të cilat janë në formën e laktozës.
Gjithashtu ky qumësht është shumë më tepër se një produkt ushqimor pasi përdoret edhe si një përbërës kozmetik. Disa nga proteinat e qumështit të gomaricës funksionojnë gjithashtu si antioksidantë.
Edhe në Shqipëri, ky lloj qumështi është përdorur në shumë krahina të ndryshme prej dekadash, kryesisht në zonat rurale, ku shpesh nënat e përdornin tek fëmijët për të zëvendësuar qumështin e gjirit.
