TikTok është duke planifikuar të lançojë një aplikacion të ri për postimin e fotove, i cili ka funksione dhe opsione të ngjashme me Instagram-in. Aplikacioni do të quhet “TikTok Notes”, raporton TechCrunch* dhe do të lançohet së shpejti. TechCrunch* – Revistë online me bazë në SHBA, e cila përditësohet me të rejat më të fundit nga bota e teknologjisë.
Aplikacioni i ri do të lidhet me TikTok-un dhe përdoruesit e tij do të mund të postojnë në TikTok Notes që prej llogarisë në TikTok. Gjithashtu, ata mund të hapin llogarinë, por mund të mos publikojnë foto në “TikTok Notes”.
TikTok e konfirmoi se është në punë e sipër për një aplikacion të ri, por saktësoi se ende është herët dhe se aplikacioni nuk është i disponueshëm.
“Si pjesë e angazhimit tonë të vazhdueshëm për të sjellë risi në përvojën e Tiktok, ne po eksplorojmë mënyra për të fuqizuar komunitetin tonë dhe për t’i inkurajuar ata të krijojnë dhe ndajnë krijimtarinë e tyre përmes fotografisë dhe tekstit në një hapësirë, dedikuar atyre”, tha një zëdhënës i Tiktok.
Ndërsa sipas TechCrunch, TikTok është duke eksperimentuar edhe me formate të tjera si videot që mund të kenë kohëzgjatje deri në 30 minuta, si dhe postimet si tekst, të ngjashme me X dhe Threads.
