TikTok përsëriti shqetësimet e tij për lirinë e fjalës në lidhje me një projekt-ligj të miratuar nga Dhoma e Përfaqësuesve që do të ndalonte aplikacionin në SHBA nëse pronari kinez i ByteDance nuk do të shiste aksionet e tij brenda një viti.
Dhoma e miratoi legjislacionin të shtunën me 360 vota pro dhe 58 kundër. Tani projektligji kalon në Senat ku mund të merret për votim në ditët në vijim. Presidenti Joe Biden ka thënë më parë se do të nënshkruajë legjislacionin për TikTok.
Shumë ligjvënës amerikanë nga partitë republikane dhe demokrate si dhe nga administrata e Biden thonë se TikTok paraqet rreziqe për sigurinë kombëtare, sepse Kina mund ta detyrojë kompaninë të ndajë të dhënat e 170 milionë përdoruesve të saj amerikanë.
“Është për të ardhur keq që Dhoma e Përfaqësuesve po përdor kopertinën e ndihmës së rëndësishme të huaj dhe humanitare për të bllokuar edhe një herë një projekt-ligj që do të shkelte të drejtat e fjalës së lirë të 170 milionë amerikanëve,” tha TikTok në një deklaratë.
