Pas SHBA-ve dhe Holandës, edhe parlamenti i Britanisë do të bllokojë TikTok në të gjitha pajisjet në rrjetin e tij pas një ndalimi të ngjashëm për pajisjet qeveritare, duke u bërë institucioni më i fundit perëndimor që ndalon aplikacionin video për shqetësime sigurie.
Një përfaqësues i TikTok e quajti veprimin “të gabuar”, duke thënë se bazohej në keqkuptime themelore për kompaninë.
“Pas vendimit të qeverisë për të ndaluar TikTok nga pajisjet qeveritare, komisionet e Dhomës së Komunave dhe Lordëve kanë vendosur që TikTok të bllokohet nga të gjitha pajisjet parlamentare dhe rrjeti më i gjerë parlamentar”, tha një zëdhënës i parlamentit.
Britania javën e kaluar ndaloi aplikacionin, në pronësi të kompanisë me bazë në Pekin ByteDance, në telefonat qeveritarë.
“Siguria kibernetike është një përparësi kryesore për parlamentin,” shtoi zëdhënësi.
Shtetet e Bashkuara, Kanadaja, Belgjika dhe Komisioni Evropian e kanë ndaluar tashmë aplikacionin nga pajisjet zyrtare.
“Ne jemi të zhgënjyer që, pavarësisht kërkesave tona, nuk na është ofruar asnjë mundësi për të adresuar shqetësimet dhe kërkojmë vetëm të gjykohemi mbi fakte dhe të trajtohemi në mënyrë të barabartë me konkurrentët tanë”, tha zëdhënësi i TikTok në një deklaratë.
Zëdhënësi shtoi se kompania kishte filluar zbatimin e një plani për të mbrojtur më tej të dhënat e përdoruesve evropianë, i cili përfshin ruajtjen e të dhënave të përdoruesve në Mbretërinë e Bashkuar në qendrat e saj evropiane të të dhënave dhe shtrëngimin e kontrolleve të aksesit të të dhënave.
Ndalimi i parlamentit britanik u njoftua pasi shefi ekzekutiv i TikTok u përball me pyetje nga ligjvënësit amerikanë të cilët janë të bindur se aplikacioni duhet të ndalohet për të qenë një kërcënim i mundshëm i sigurisë kombëtare për Shtetet e Bashkuara.
