Në kushte të vështira ekonomike emigrimi është zgjidhja e parë që të vjen ndër mend. Plot të rinj braktisin arsimin që në hapat e para në rrugën e tyre të dijes.
Mirëpo kjo “zgjidhje” po përkeqëson më tej kapitalin human.
Sektori i Arsimit lë për të dëshiruar, e dita ditës po përkeqësohet në disa tregues në vend që të ecë përpara.
Sipas një studimi të Këshillit të Bashkëpunimit Rajonal vihet re se Shqipëria ka përqindjen më të madhe të braktisjes së hershme të arsimit në Rajon.
Në vitin 2021 gati 17% e popullsisë së moshës 18-24 vjeç nuk ishin të angazhuar as në arsim as në trajnim.
Kjo përqindje e lartë e 20 vjeçarëve pa asnjë angazhim në arsim ishte gati tre herë më e lartë se mesatarja europiane.
Në Bosnje vetëm 4.7% e të rinjve 18-24 vjeç nuk ishin as në arsim as në trajnim, në Malin e Zi, 6.7% në Maqedoninë e Veriut 4.6% dhe në Serbi 6.2%.
Në vitin 2021 numri i atyre që largohen herët nga arsimi ka rënë në shumicën e ekonomive të Ballkanit Perëndimor dhe kryesisht mbetet nën mesataren e BE-së (9.7%), përveçse në Shqipëri ku ky fenomen mbetet në rritje në krahasim me vitin 2020.
Formimi bazë dhe mos arsimimi i të rriturve gjatë gjithë jetës ndikon në punësim dhe për rrjedhojë në mundësi për punësim në popullatën e rritur.
Gjithashtu mungesa e njohurive bazë pengon në rritjen e qëndrueshme të ekonomisë dhe përditësimin e modeleve të reja të zhvillimit, si dhe përhapjen e teknologjisë e zhvillimin e ekonomisë.
Përqindja e të rinjve të grupuar as punësim, as arsimim ose trajnimi u ul pak në vitin 2021 në pothuajse të gjitha ekonomitë e Ballkanit Perëndimor, por në Kosovë kjo kategori përfshin 40.4% të te rinjve, 26.5% në Mal të Zi, 26.1% në Shqipëri, 25.1% në Bosnje dhe Hercegovinë, 24.2% në Maqedoninë e Veriut dhe 18.8% në Serbi.
Në BE vetëm 13% e të rinjve 15-29 vjeç nuk janë as në punë as në shkollë dhe as në ndonjë trajnim.
