Janë duke u zhvilluar në Malin e Zi zgjedhjet Parlamentare.
Në garë janë 15 subjekte zgjedhore ku ndër to janë dhe 2 koalicione të partive shqiptare.
Kryetari i partisë “Forumi Shqiptar”, njëkohësisht dhe Kryetari i Komunës së Tuzit Nik Gjeloshaj, u shpreh se orientimi i shqiptarëve në Malin e Zi do të jetë vetëm ai euroatlantik, duke theksuar se këta të fundit luajnë rol parësor në komunikimin e vendit me instancat europiane.
“Shqiptarët bashkë me pakicat e tjera janë mburoja më e madhe e asaj rrugës euroatlantike të Malit të Zi dhe besoj se pjesëmarrja e madhe e shqiptarëve, uroj që shqiptarët sot të dalin me sa më shumë mandate që të jenë sa më shumë në parlament dhe mendoj se kjo është e mirë për orientimin e Malit të Zi për integrimin euroatlantik”, tha Gjeloshaj.
Ndër të tjera, Gjeloshaj shprehu edhe shqetësimin për limitin e pakët të mandateve që ofron ligji malazez për përfaqësimin e shqiptarëve në kuvend.
“Maksimumi shqiptarët mund të prodhojnë deri në 3 mandate. Ky është ligji zgjedhor për fat të keq që ne na limiton si komb në Mal të Zi dhe është ajo që do të luftojmë politikisht të ndryshohet”, tha ndër të tjera Gjeloshaj.
