Përkujtojmë sot me krenari 556 vjetorin e ndarjes nga jeta të Heroit tonë Kombëtar, 𝐆𝐣𝐞𝐫𝐠𝐣 𝐊𝐚𝐬𝐭𝐫𝐢𝐨𝐭 𝐒𝐤𝐞̈𝐧𝐝𝐞𝐫𝐛𝐞𝐮. Gjergj Kastrioti, Heroi Kombëtar i Shqipërisë lindi në vitin 1403. I përkiste familjes fisnike të Kastriotëve. I ati ishte Gjon Kastrioti, udhëheqës i qyteteve më të mëdha të asaj kohe, Krujës dhe Mirditës dhe e ëma ishte Vojsava.
Kur lindi Skënderbeu, i ati, Gjon Kastrioti, ishte sundimtar i një shteti të rëndësishëm, që shtrihej së paku nga rrethinat e Prizrenit e të Tetovës në lindje deri në Detin Adriatik, në perëndim.
Gjergj Kastrioti ka hyrë në histori si një strateg i shquar i luftimeve mbrojtëse, sepse me një ushtri të vogël mundi të përballonte dhe të shkatërronte ushtrinë osmane, më të organizuarat dhe më modernet e kohës së vet. Si një burrë i madh shteti, ai udhëhoqi luftën për pavarësi të kombit shqiptar kundër pushtuesit osman, si dhe punoi për bashkimin politiko-shtetëror të popullit shqiptar.
Me Kuvendin e Lezhës Gjergj Kastrioti Skënderbeu vuri themelet shtetit shqiptar. Për 25 vjet me radhë Skënderbeu mbrojti lirinë e popullit dhe të vendit të vet dhe lufta e tij pengoi përhapjen osmane drejt Evropës, për çka fitoi mirënjohjen e Shteteve Evropiane dhe të Papatit të Romës që kur ka qenë gjallë dhe shumë më tepër pas vdekjes.
Në janar të vitit 1468 Skënderbeu u sëmur gjatë zhvillimit të një Kuvendi të thirrur nga ai, në të cilin ishin të ftuar të gjithë princat shqiptarë. Ai vdiq në moshën 63-vjeçare më 17 Janar 1468 në Lezhë.
Ai konsiderohet nga shumë vende të Evropës Perëndimore si heroi që pengoi Perandorinë Osmane të pushtonte Perëndimin e Evropës. Gjergj Kastriot Skënderbeu mbetet figura legjendare e kombit shqiptar në shekuj.
Vdekja e Skënderbeut nënkuptoi fundin e pavarësisë së Shqipërisë, që vetëm falë tij arriti të shfaqej si një shtet i bashkuar dhe i pavarur.
Kruja që për shumë vite u quajt si Akropoli i Kristianizmit, rezistoi vetëm një rrethim tjetër pa prijësin e saj. Gjergj Kastriot Skënderbeu, Heroi Kombëtar i Shqipërisë vulosi me veprat e tij rezistencën kundër turqve pushtues në shekullin e 15-të dhe ishte një shembull për imitim për të gjithë heronjtë e mëvonshëm
Vepra dhe figura e Skënderbeut personifikon një epokë të tërë të historisë kombëtare të shqiptarëve, që mori emrin e tij dhe shënoi një kthesë vendimtare në zhvillimin politik të vendit dhe forcimin e vetëdijes kombëtare.
Figura e Tij është vlerësuar nga personalitetet më të shquara evropiane të kohës, si strateg ushtarak dhe diplomat i zoti, si burrë shteti që e integroi Arbërinë e tij në traktatet e para të Evropës politike, si ‘Atlet i Krishtit’ dhe pararendës i aleancave ushtarake të kohës.
Kujtimi i 𝐒𝐤𝐞̈𝐧𝐝𝐞𝐫𝐛𝐞𝐮𝐭 jeton, jo vetëm në zemrën e popullit që e lindi, por kalon kufijtë e Gadishullit të Ballkanit.
