Dosja e skandalit te spitali Onkologjik në Tiranë është transferuar nga Prokuroria e Tiranës drejt SPAK-ut për hetime të mëtejshme.
Raportohet se vendimi për shpalljen e moskompetencës nga Prokuroria e Tiranës është marrë pak ditë më parë nga prokurori Bledar Valikaj, i cili ka vendosur që këtë çështje t’ua kalojë për hetim më të thelluar prokurorëve të SPAK-ut.
Mjeku Edmond Gashi, ish-zv/drejtoresha e Qendrës Spitalore “Nënë Tereza”, Brikena Qirjazi, koordinatori i spitalit Emiljano Lela dhe mjekja e spitalit Onkologjik, Alketa Ymeri Pere, të cilët akuzohen për “Shpërdorim detyre”, do të hetohen edhe për pasurinë e tyre. Vetëm Gashi disponon 13 pasuri të paluajtshme.
Bashkë me mjekët në SPAK kanë përfunduar edhe administratori i klinikës “Megis”, Halil Gashi, dhe administratori i farmacisë, Florian Marku.
Mjekët i detyronin pacitetët të bënin radioterapinë apo ndërhyrjet kirurgjikale te klinika private “Megis”, ku pronar rezulton vetë mjeku Edmond Gashi. Ndërkohë nuk u jepnin as medikamentet e nevojshme.
Personat e përfshirë në dosje
-Edmond Gashi, mjek – “Arrest shtëpie” – “Shpërdorim detyre”.
-Alketa Ymeri (Pere) mjeke – “Detyrim paraqitje” – “Shpërdorim detyre”.
-Brikena Qirjazi – zv.drejtoreshë e QSUT – “Detyrim paraqitje” – “Shpërdorim detyre”.
-Emiljano Lela, koordinatori pranë Onkologjikut – “Detyrim paraqitje” -“Shpërdorim detyre”.
-Drilona Kishta, ish-specialiste pranë QSUNT – “Detyrim Paraqitje” – “Shpërdorim detyre”.
-Halil Gashi, administrator i klinikës “Megis” – “Detyrim paraqitje”.
-Florian Marku, administrator farmacie – “Arrest shtëpie” – “Fshehje e të ardhurave”.
