Sekretariati i Etikës ka vendosur të përjashtojë me 10 ditë nga Kuvendi deputetët demokratë, Flamur Noka dhe Gazment Bardhi. Gjithashtu, Sekretariati i Etikës ka vendosur 5 ditë përjashtim për deputetët, Bledion Nallbati dhe Asllan Dogjani.
Vendimi vjen pas kërkesës së PS për përjashtimin e tyre në lidhje me kaosin e shkaktuar në Kuvend në seancën e 15 Janarit që solli në dështimin e marrjes së fjalës së Presidentit Begaj për të përshëndetur ligjvënësit në hapje të sesionit të ri, si dhe me përplasjen që deputetët Bardhi dhe Noka kanë pasur me kolegen e tyre demokrate, Flutura Açka.
Në mbledhjen e dy ditëve më parë të Komisionit të Medias, Bardhi dhe Noka i mbyllën mikrofonin me forcë koleges së tyre Flutura Açka për të mos lejuar vazhdimin e mbledhjes së këtij komisioni, si pjesë e aksionit të tyre opozitar për bllokimin e punës së Kuvendit.
