Familjarët e 31-vjeçarit Ergys Arrazi, të arrestuar për dhunë ndaj bashkëshortes dhe 3 fëmijëve, si dhe për shkaktim të vetëvrasjes së tyre, janë të shokuar dhe tronditur nga rasti tragjik.
Ata kanë deklaruar për mediat se Ergysi i kishte pikë të dobët fëmijët dhe nuk i keqtrajtonte kurrë. Ata thonë se nuk do ia falin nuses (Alma Arrazi) vendimin fatal që ka ndërmarrë duke i marrë jetën vetes dhe 3 fëmijëve.
Sipas tyre, kohët e fundit çifti ka patur debate dhe Alma merrte ilaçe në ambulancën e lagjes për gjendje të rënduar emocionale.
“Jemi të lëndur dhe shokuar, nuk ia falim nuses vendimin fatal që ka ndërmarrë duke i marrë jetën vetes dhe tre fëmijëve. Erdgysi i kishte pikë të dobët fëmijët, ai nuk i ka keqtrajtuar asnjëherë. Punonte gjithë ditën në dyqan celularësh për t’i dërguar në shkolla private. Çifti kohët e fundit kanë patur debate dhe Alma merrte ilaçe në ambulatorin e lagjes për gjendje të rënduar emocionale, por këtë vendim as nuk mund ta imagjinonim.”
Ndërkohë deri më tani në lumin Buna është gjetur vetëm trupi i 9-vjeçares Ergesa Arrazi, e cila do përcillet sot për në banesën e fundit. Kërkimet për gjetjen e mamasë së saj dhe dy fëmijëve të tjerë vijojnë ende dhe madje janë zgjeruar edhe në Mal të Zi.
