Deputeti i Partisë Demokratike nga radhët e Rithemelimit, Flamur Noka, ka reaguar pas lajmeve, që SPAK ka nisur hetimin pasuror ndaj tij.
I ftuar në A2 CNN, Noka tha se nuk është vënë në dijeni të hetimeve nga Prokuroria e Posaçme, megjithatë shprehet se nuk është aspak i shqetësuar për shkak se pasuria e tij është e deklaruar.
Ai e konsideroi lajmin si një presion nga ana e kreut të SPAK Altin Dumanit, por shton se kjo nuk e step në betejën e tij opozitare.
“Nuk e di dhe nuk shqetësohem fare, e kam thënë qe e kam deklaruar pasurinë prej 16 vitesh, jam i pastër para ligjit në mënyrë absolute.
Kam një apartament që kam 16 vjet që paguaj kredi, kam një makinë që kam 10 vite që paguaj kredi, asgjë tjetër përveç trupit tim.
Nuk jam në dijeni, por të të vazhdojnë sa të duan, nuk kam shqetësim, nuk i kam futur dorën askujtnë xhep, fle i qetë. A, nëse duan të hetojnë, duan të shfryjnë duf, le të vijojnë, Dumani apo dushmani. Asgjë nuk më ndal për këtë betejë time”, tha Noka.
Gjatë ditës së djeshme, Noka ishte Dumanit në Komisionin e Ligjeve, ku i kërkoi ‘’logari” kreut të SPAK për arrestimin e Sali Berishës, ndërsa tha se prokurorët veprojnë me regji për të goditur opozitën. Nga ana e tij kreu i SPAK Altin Dumani hodhi poshtë akuzat e PD-së, duke thënë se prokurorët janë të lirë të ndërmarrin hetime për cilindo zyrtar, dhe se nuk janë peng i asnjë segmenti të politikës.
