Rusia ka drejtuar gishtin nga Shtetet e Bashkuara duke thënë se ata qëndronin pas një sulmi me dron në Kremlin që synonte të vriste presidentin Vladimir Putin, ndërsa forcat e Moskës qëlluan më shumë dronë luftarakë në qytetet ukrainase duke përfshirë edhe kryeqytetin Kiev.
Presidenti ukrainas Volodymyr Zelenskiy, duke folur në Hagë pas vizitës në Gjykatën Ndërkombëtare të Drejtësisë (ICC), tha se Putin duhet të vihet para drejtësisë për luftën dhe tha se Kievi do të punojë për të krijuar një gjykatë të re për këtë qëllim.
Zëdhënësi i Putinit, Dmitry Peskov, pa dhënë prova, tha se Ukraina kishte vepruar sipas urdhrave të SHBA-së me sulmin e supozuar me dron në kështjellën e Kremlinit në orët e para të së mërkurës.
Zëdhënësi i Sigurisë Kombëtare të Shtëpisë së Bardhë, John Kirby, tha se Peskov “thjesht gënjen” dhe tha se Shtetet e Bashkuara as nuk e inkurajuan dhe as nuk e lejuan Ukrainën të sulmonte jashtë kufijve të saj. Ai shtoi se ishte ende e paqartë se çfarë kishte ndodhur në Kremlin.
Kievi gjithashtu ka mohuar përfshirjen në incidentin, i cili pasoi një varg shpërthimesh gjatë javës së kaluar që synonin trenat e mallrave dhe depot e naftës në Rusinë perëndimore dhe Krimenë e kontrolluar nga Rusia. Moska ka fajësuar edhe Ukrainën për këto sulme.
“Përpjekjet për të mohuar këtë (sulm ndaj Kremlinit), si në Kiev ashtu edhe në Uashington, janë sigurisht absolutisht qesharake. Ne e dimë shumë mirë se vendimet për veprime të tilla, për sulme të tilla terroriste, nuk merren në Kiev, por në Uashington. ”, tha Peskov.
Peskov tha se një hetim urgjent ishte duke u zhvilluar dhe se çdo përgjigje do të shqyrtohej me kujdes dhe do të balancohej.
Më vete, ministria e jashtme e Rusisë tha se sulmi i supozuar me dron “nuk duhet të mbetet pa përgjigje” dhe se ai tregoi se Kievi nuk kishte dëshirë t’i jepte fund luftës 15-mujore në tryezën e bisedimeve.
