Nxënësit e klasave të 12-ta i nënshtrohen sot provimeve të lirimit.
Maturantët nisin këtë të enjte provimin e Gjuhës së Huaj, e cila shënon dhe provimin e parë për ta.
Procesi është parashikuar të nisë në orën 10:00 dhe do të zgjasë rreth 2 orë e 30 minuta.
Ndërsa në datën 7 qershor, maturantët do të zhvillojnë provimin e dytë, atë të Gjuhës Shqipe dhe Letërsisë, më 13 qershor do të zhvillohet provimi i Matematikës.
Gjithashtu provimi i lëndës me zgjedhje do të zhvillohet në datën 9 qershor.
Rreth 30 mijë maturantë nisin sot provimet të cilat do t’iu hapin një rrugë të gjatë drejtë ëndrrave të tyre.
Por në ndryshim nga maturat e viteve të shkuara, për të pasur një mbarëvajtje sa më të mirë të provimeve, si dhe për të shmangur abuzimet që mund të bëhen me procesin e administrimit, Ministria e Arsimit dhe Sportit ka vendosur që këtë vit provimet nuk do të zhvillohen me nëpër klasa dhe ambiente të vogla. Për provimet e detyruara dhe lëndën me zgjedhje, si ambiente provimi janë zgjedhur sallat e mëdha.
Mbi 7800 mësues janë angazhuar për të monitoruar provimet e Maturës Shtetërore të cilat këtë vit do të zhvillohen kryesisht në palestra dhe në korridoret e shkollave.
Për provimet e këtij viti është vendosur që të hiqet fleta e përgjigjeve. Kështu maturantët do të mund të plotësojnë përgjigjet e sakta direkt në tezën e provimit dhe jo më në fletën e përgjigjeve, sikundër ka ndodhur deri në maturën e vitit të shkuar.
Sipas ekspertëve, është vlerësuar se plotësimi edhe i kësaj flete merr më shumë kohë për maturantët, ndërkohë që shton riskun për më shumë gabime. Duke hequr plotësimin e kësaj flete, maturanti ka më shumë kohë në dispozicion për të bërë plotësimin e duhur të përgjigjes direkt në test.
Si dhe për të gjitha provimet, ato të detyruara dhe lëndët me zgjedhje, maturantët do të kenë mundësi që jo vetëm të kërkojnë kopjen e korrigjuar të testit, por edhe të bëjnë rivlerësimin e tij, në rastet kur do të jenë të pakënaqur me notat e marra.
