Ministri i Jashtëm i vendit fqinj Greqisë, Nikos Dendias ka rikthyer në vëmendje çështjen e detit me Shqipërinë.
Diplomati grek ka paralajmëruar se këtë vit do të ketë zhvillime, ndërsa tha se “pala shqiptare po përgatit të nënshkruajë dhe t’i dorëzojë Presidentit një prokurë, në mënyrë që ekipit negociator t’i jepet mundësia për të diskutuar me Greqinë për këtë çështje”.
“Kur do të ndodhë kjo?
Këtë duhet ta përcaktojë kryeministri i Shqipërisë, por mendoj se nuk do të jetë shumë vonë”, tha Nikos Dendias.
Dendias ka thënë se në marrëdhëniet me Shqipërinë në një masë të madhe ka ndryshuar modeli dhe se ai beson në miqësinë greko-shqiptare apo edhe tek ura lidhëse e minoritetit grek.
“Unë besoj në miqësinë greko-shqiptare. Unë besoj se minoriteti grek është një urë lidhëse që lidh dy vendet dhe dua t’ju them se Shqipëria duhet t’i kushtojë vëmendje diçkaje nga pala greke.
Shqipëria e ka pranuar absolutisht atë që ne i propozojmë Turqisë, pra një bashkë-premtim të zgjerimit të ujërave territoriale. Shqipëria tha drejtpërdrejt se Greqia mund të zgjerojë ujërat e saj territoriale. Pra, mendoj se duhet pasur kujdes për pozitën e guximshme shqiptare”, tha ndër të tjera Dendias.
Në parlamentin grek, më 20 janar 2021 u miratua projektligji për zgjerimin e ujërave territorialë të vendit nga 6 në 12 milje në Detin Jon.
Ky vendim u shoqërua me debate dhe reagime të shumta në Shqipëri për faktin se sa mund të ndikojë vendimi i Greqisë në zonën ekskluzive ekonomike dhe efekti i ishujve grekë në përcaktimin e zonave detare mes dy vendeve. Kështu që kjo çështje u vendos që të ndahej në Hagë.
