Aleks Marku është 40-vjeçari që ka mbajtur peng fëmijët e tij të mitur dhe ka qëlluar me kallashnikov në ajër dhe drejt forcave RENEA.
Kur është arrestuar dhe marrë në pyetje, 40-vjeçari ka deklaruar se ka qëlluar pasi kishte frikë se do e qëllonin, por pa dhënë shpjegime se nga kush apo pse.
Kur ka terrorizuar fëmijët dhe lagjen me kallashnikov, Marku ka qenë nën ndikimin e lëndëve narkotike. Ai njihet si person problematik dhe bashkëshortja e familjarët e saj e kanë denoncuar në polici për dhunë fizike por edhe psikologjike. Por sipas tyre, policia e ka lënë të lirë edhe pse e ka ditur se ai ishte përdorues i lëndëve narkotike.
Bashkëshortja e tij pasi është pajisur me urdhër mbrojtje ka ikur në Itali, ndërsa fëmijët prej një muaji qëndronin me babain e tyre në shtëpinë e marrë me qira në zonën e Shkëmbit të Kavajës në Durrës.
Edhe banorët e lagjes thonë se babai ishte person problematik dhe fëmijët bënin një jetesë jo normale.
