Inteligjenca artificiale ditët e fundit po vë në përballje titanët e teknologjisë në garë se kush të lançojë i pari aplikacione për lehtësimin e jetës pas chatbotit ChtGPT.
Motori i kërkimit Google po përshpejton për nxjerrjen në treg teknologjinë AI për rivalizimin e ChatGPT.
Jo vetëm Google, por edhe gjigandi i e-commerce Alibaba ka si qëllim të krijojë një chatbot të ri të fuqizuar nga inteligjenca artificiale.
Vetë kompania e konfirmoi një lajm të tillë me CNBC. Momentalisht nuk është bërë publike data lançimit apo shërbimet që do ofrohen, por bën të ditur se ka nisur zhvillimin e kësaj teknologjie që prej vitit 2017 dhe momentalisht është në fazën testimi.
Para pak ditësh, Google prezantoi chatbot-in e ri Bard, i cili është gjithashtu ende në fazë testimi. Falë investimit në OpenAI, Microsoft ka arritur të integrojë teknologjinë e ChatGPT në motorin e tij të kërkimit Bing, duke tërhequr vëmendjen e shumë përdoruesve.
Alibaba nuk ka treguar se në cilat segmente do të përdorë fuqinë e madhe të inteligjencës artificiale, megjithatë duke patur parasysh se kompania është e përfshirë në shumë biznese të ndryshme, do të jetë mjaft i lehtë implementimi i kësaj teknologjie.
Një tjetër kompani kineze, Baidu është në fazën e testimit të teknologjisë AI të quajtur “Ernie Bot”.
