Drejtori i DPSHTRR Blendi Gonxhe duket se nuk ka ndërmend të tërhiqet nga afera me rritjen e çmimit të patentave. Autoriteti i Konkurrencës refuzoi paktin skandaloz të Gonxhes me Autoshkollat, pasi parashikohet një dyfishim i çmimit. Por kreu i Transporteve nuk ka ndërmend të lëvizë.
Gonxhja tha se 100 deri ne 200 euro më shumë janë të domosdoshme për një test të plotë e jo fiktiv, por duke mos dhënë asnjë garanci që nuk do blihen më patentat.
“Nuk jemi tërhequr, me Autoritet, pa Autoritet ajo do të eci para. Nuk diskutohet që jo vetëm që nuk rrezikon konkurrencën kjo që po bëjmë ne në mënyrë të pariparueshme, por në mënyrë të pariparueshme rrezikohej konkurrenca nga ajo që nuk po bënte autoriteti dhe autoritetet e tjera që nuk kanë punuar në vite për të mbrojtur konkurrencën e ndershme.
Nuk mund të ulim kokën në rërë si struci e të themi që jemi të varfër, ndërkohë që ne jemi shumë të pasur, paguam 403 milionë dollarë. Po kur vjen puna nuk duam ta bëjmë 100-200 euro më shumë atë testin e ta bëjmë të plotë, të mos jetë fiktiv. Pra, dua të them që ne nuk i ikim dot kësaj pune. Kjo punë kërkon edukatë, kërkon kulturë”, tha Gonxhe.
Ecja me shpejtësi marramendëse në rrugë, duke u bërë burim aksidentesh të rënda, Gonxhja tha se është pjesë e një përgjegjësie sociale që mungon dhe edukimi në kuadër të politikave parandaluese duhet të nisë që nga shkolla. Ndërkohë ai i mëshoi fort zbatimit të sistemit bonus malus në siguracionin e përvitshëm të mjeteve.
