Vite më parë të gjithë i hidhinin sytë nga Mercedes, duke dashur të zbulonin sekretin e ‘Shigjetave të argjendta’, që dominonin skenën që prej fillimit të erës të motorëve hibridë. Sot pika e referimit në F.1 është Red Bull-i, ndaj dhe është logjike që rivalët të përpiqen të zbulojnë ‘magjitë’ e kësaj skuderie dhe t’i kopjojnë.
Njërën mbi të gjitha, pjesën e pasme që te makinat Red Bull funksionon si një turbo, duke garantuar një avantazh të madh në shpejtësi, kur Vershtapen dhe Perez synojnë të bëjnë një parakalim. U pa fundjavën që shkoi në Azerbajxhan, ku këtë pjesë e vuajti ferraristi Leklerk.
Ferrari, por gjithashtu edhe Mercedesi dhe skuderitë e tjera, po përpiqen prej kohësh të kuptojnë si funksionon sistemi. Dhe mënyra ideale është për të marrë nga Red Bull-i dikë që mund të propozojë mënyrën e ndërtimit të një makine efikase, që ka njohuri teknike të një skuadre fituese.
Për këtë arsye, drejtuesi i Ferrarit, Frederik Vaseur, po punon pas kuintave për të përforcuar skduerinë me blerje të rëndësishme. Njoftimi u dha në Baku, ndoshta si përgjigje për Alpha Taurin, skuadra satelit e Red Bull-it, që sapo kishte zyrtarizuar afrimin e Laurent Mekies, drejtorin aktual të garave te Ferrari.
“Jemi duke menduar për një fushatë afrimesh për përforcimin e skuderisë. Shpesh vëmendja është tek ata që ikin, por janë edhe ata që vijnë”, – tha Vaseur. Një referim për David Sançez, i cili la Ferrarin për të kaluar te MecLaren. Skuderia italiane ka kaluar tashmë në kundërsulm.
Objektivi kryesor janë inxhinierët e Red Bull-it, por tentativat e deritanishme nuk kanë pasur sukses.
Bëhet fjalë për Enriko Balbon, shefi i sektorit aerodinamik të Red Bull-it, që ka refuzuar të largohet nga Milton Keynes.
Po ashtu, nga Ferrari është kontaktuar edhe Pierr Uashé, drejtori teknik i skuadrës kampione bote. Edhe në këtë rast propozimi i parë është hedhur poshtë. Te Ferrari po vijnë inxhinierë të tjerë, që janë të nivelit mesatar, si ata që afroi Matia Binoto vitin e kaluar. Duhet pak kohë që plani i përforcimit të skuderisë të konkretizohet, gjithmonë nëse objektivat do të realizohen.
