I ftuar në emisionin “Rudina”, gazetari i njohur Blendi Fevziu ka folur për jetën e tij private, profesonale dhe karrierën ndër vite, si dhe është ndalur në një nga momentet më të vështira.
I emocionuar, ai ka treguar se vetëm pak orë pasi kishte humbur nënë e tij, i erdhi një tjetër lajm i trishtë se një tjetër njeri i dashur për të ishte ndarë nga jeta. E pas gjithë kësaj tragjedie, Blendit i është dashur të dalë sërish në ekran sikur asgjë të mos kishte ndodhur.
“Momenti më i vështirë ka qenë një moment, kur ime më ndërroi jetë në Boston në Shtetet e Bashkuara të Amerikës. U deshën 6-7 ditë që të vinte trupi i saj. Ne shkuam bëmë varrimin, të pasnesërmen duhet të nisesha për në Kosovë sepse kisha lënë një intervistë shumë të rëndësishme me Hashim Thaçin që në atë kohë u akuzua nga Dick Marty për këtë gjë që po gjykohet sot. Atë ditë kur po bëhesha gati të nisesha më thanë që daja i mamit, njeriu që më kishte rritur, që rrinte në shtëpi po me ne aty, kishte ndërruar jetë dhe ai.
Ishte një dilemë e tmerrshme sepse ndërkohë u detyrova të mbaroj të gjitha gjërat, mora në telefon, thashë nëse mund të më vini një eskortë policie në pjesën e Kosovës se rruga jonë ishte bërë ndërkohë, mund të shkoje. Ata më vunë në fakt një eskortë dhe unë kam arritur 4 minuta para emisionit, por imagjino se si mund të shkojë njeriu në emision kur një ditë para ka varrosur nënën, një ditë tjetër njeriun më të afërt, megjithatë ndonjëherë ti e kupton që raporti me detyrën është i tillë që ti nuk mund të shkosh”, ka përfunduar gazetari duke treguar kështu sfidat e profesionit të tij.
