Në një çast të sfidës, drejtoresha e klubit të Tiranës u afrua në një pjesë të fushës, ku bënte gjestin e turpshëm, e cila i vendosi në kokë gjyqtarit fanellën e klubit bardh dhe blu në shenjë revoltimi dhe inati. Gjatë një postimi në Facebook, Deborah Keçi shpreh pendimin e saj ndaj veprimit të turpshëm kundrejt gjyqtarit.
“Në sport, emocionet luajnë një rol shumë të rëndësishëm, jo vetëm për sportistin, por edhe për të gjithë ata që janë të përfshirë. Emocionet gjenerohen nga aktiviteti sportiv dhe nga ana tjetër mund të ndikojnë si tek sportistët, trajnerët dhe drejtuesit e ekipeve.
Si ish sportiste që vazhdoj akoma të ushtroj aktivitet sportiv dhe të ndiej akoma emocione dhe kënaqësi nga sporti, si drejtuese e një ekipi me emër në historinë e sportit shqiptar, është shumë e vështirë të pranosh në heshtje dhe me kënaqësi një padrejtësi qe i bëhet mundit dhe djersës së sportistëve dhe pasionit të tyre.
Kush ka qenë sportist kupton dhe ndjesinë nga padrejtësia, kush vazhdon ndjek sportin nëpër botë, shikon dhe reagimet e sportistëve, trajnerëve dhe drejtorëve ekzekutiv. Por, në cilësinë e Drejtoreshës Ekzekutive, ju kërkoj ndjesë sportdashësve të pranishëm dhe shikuesve”.
