Aplikacioni WhatsApp po zhvillon një veçori të re që e ka quajtur “Chat Lock” ose mbyllja e bisedës, me synimin për ta bërë më private përmbajtjen e mesazheve.
Bisedat e “kyçura” do të mbahen në një dosje të mbrojtur me fjalëkalim ose me identifikim biometrik dhe njoftimet e ardhura nga ato biseda, nuk do të shfaqin në ekran dërguesin apo përmbajtjen e mesazhit.
“Chat Lock” ka filluar shpërndarjen dhe do të ketë përmirësime në të ardhmen.
Përmes një postimi në Facebook, CEO i Meta, Mark Zuckerberg shkruan se:
“Gjatë muajve të ardhshëm ne do të shtojmë më shumë opsione për Chat Lock, duke përfshirë kyçjen për pajisjet shoqëruese, krijimin e një fjalëkalimi të personalizuar për bisedat tuaja, në mënyrë që të mund të përdorni një fjalëkalim unik të ndryshëm nga ai i telefonit tuaj”.
Krahas këtij njoftimi, përdoruesit e “WhatsApp” u surprizuan nga një tjetër mundësi përditësimi, ku do të bëhet e mundur që mesazhi të modifikohet pasi të jetë dërguar. “Kleçka” është që mesazhi mund të modifikohet vetëm brenda 15 minutave të para që nga dërgimi.
Ky përditësim nuk është ende zyrtar, por është parashikuar nga portali informues për ndryshimet e “WhatsApp”, WaBetaInfo.
