Presidentja e Kosovës, Vjosa Osmani, ka thënë se është e nevojshme që Shqipëria të jetë zëri i Kosovës në institucionet ku Kosova nuk ka përfaqësim. Në një takim me presidentin e Shqipërisë, Bajram Begaj, që po qëndron në Kosovë për kremtimin e 15-vjetorit të pavarësisë, Osmani ka thënë se ka nevojë për koordinim e harmonizim të marrëdhënieve Kosovë-Shqipëri.
Në këtë takim, sipas njoftimit nga Presidenca të enjten, Osmani ka theksuar se Kosova po e kremton 15-vjetorin e shtetësisë në përballje me sfida, “por e vendosur për të ecur përpara në forcimin e shtetit dhe e përkushtuar në rrugëtimin euroatlantik”.
“Në këtë 15-vjetor të pavarësisë kujtojmë me respekt të gjithë ata që kontribuuan për lirinë, pavarësinë dhe shtetndërtimin, që nga arkitekti i shtetit të Kosovës, presidenti historik, dr.Ibrahim Rugova e deri te vajzat e djemtë e UÇK-së, të udhëhequr nga komandanti legjendar Adem Jashari, shumë nga të cilët ranë heroikisht për lirinë dhe Republikën”, ka theksuar Osmani.
Dy presidentët janë zotuar për angazhim për intensifikim të raporteve vëllazërore.
“Në këtë funksion, Presidentja Osmani vuri në dukje nevojën për një koordinim dhe harmonizim të mëtejmë, posaçërisht në sferën e politikës së jashtme, me ç`rast potencoi nevojën që Shqipëria të jetë zë i fuqishëm i Kosovës në institucionet ku aktualisht Kosova nuk ka përfaqësim. Të dy presidentët theksuan se Kosova e Shqipëria janë bashkërisht të angazhuara dhe të përkushtuara në mbrojtjen e demokracisë, paqes dhe lirisë dhe se stabiliteti i rajonit është jetik në mënyrë që të dy shtetet të vazhdojnë rrugëtimin evropian”, thuhet në komunikatë.
Begaj ka uruar Osmanin dhe qytetarët e Kosovës për 15-vjetorin e pavarësisë dhe ka theksuar se Shqipëria do të jetë vazhdimisht në krah të Kosovës duke kontribuar në fuqizimin e pozitës ndërkombëtare të saj.
