Pas tërmetit shkatërrues më 6 shkurt, toka ende nuk ka gjetur stabilitet duke u goditur nga pas lëkundje të shumëta.
Një tërmet me magnitudë 5.6 goditi këtë të hënë provincën Malatya të Turqisë, raporton Autoriteti i Menaxhimit të Fatkeqësive dhe Emergjencave.
Tërmeti ndodhi në një thellësi prej 6,96 kilometrash (4,32 milje) rreth orës 09:00 të mëngjesit me qendër në rrethin Yeşilyurt të qytetit.
Në deklaratën pas tërmetit, kreu i menaxhimit të Fatkeqësive dhe Emergjencave, Yunus Sezer, deklaroi për një viktimë dhe 69 të plagosur.
Sipas informacionit paraprak, dhjetëra ndërtesa u shkatërruan në këtë tërmet të fundit dhe ekipet e kërkim-shpëtimit u dërguan në rajon.
“Pas tërmetit me magnitudë 5.6 që ndodhi në rrethin Yeşilyurt të provincës Malatya, u konstatua se dhjetëra ndërtesa janë shembur dhe ekipet tona të kërkim-shpëtimit u dërguan shpejt në rajon dhe filluan të punojnë”, mësohet të thuhet në njoftim.
Qytetarët që kanë dalë në rrugë menjëherë pas tërmetit janë paralajmëruar që të qëndrojnë larg strukturave të prishura dhe të mos hyjnë në objektet e dëmtuara. Gjithashtu u tha se tërmeti përveç Malatyas është ndjerë edhe në provincat përreth, duke përfshirë Kahramanmaraş, Gaziantep, Adiyaman dhe Şanlıurfa.
Ky është një tjetër tërmet i madh që ka goditur Turqinë pas atyre të mëparshmëve që kanë shkaktuar mbi 50 mijë viktima deri më tani.
