Takimi i vendeve të G20 e shefat e financave ka përfunduar pa një marrëveshje pasi Kina dhe Rusia refuzuan përshkrimin për luftën me Ukrainën me një dokument përfundimtar. Takimi është mbajtur në Indi dhe në dokumentin e lëshuar thuhet se nuk është arritur konsensus mes palëve për luftën në Ukrainë. Takimi është mbajtur më 24 shkurt ku përkon dhe me 1 vjetorin e luftës Rusi- Ukrainë.
Grupi i shtatë shteteve më të industrializuara (G7) ka miratuar sanksione të reja kundër Rusisë të premten, teksa bisedimet e G20-ës janë përmbyllur në konfuzion. Sekretarja amerikane e Thesarit, Janet Yellen, e ka dënuar “luftën ilegale kundër Ukrainës”, në një sesion ku kanë marrë pjesë edhe zyrtarët rusë dhe i ka bërë thirrje G20-ës që të bëjë më shumë për të mbështetur Ukrainën.
Në takimin e fundit të G20-ës të mbajtur në Bali të Indonezisë, liderët e kanë dënuar ashpër luftën dhe kanë paralajmëruar se konflikti është duke e rritur brishtësinë në ekonominë botërore. Në këtë grup bën pjesë Rusia, por edhe shtetet si Kina dhe India, të cilat kanë marrëveshje të rëndësishme tregtare me Moskën.
Lufta në Ukrainë ka nisur më 24 shkurt 2022. Presidenti rus, Vladimir Putin, e quan luftën si “operacion special ushtarak” për të çmilitarizuar Ukrainën. Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra. Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre.
