Në orët e vona të mbrëmjes u nxor i gjallë nga rrënojat Mustafa Avci, u dërgua për mjekim në spital ku takoi për herë të parë vajzën e tij. Vogëlushja ka lindur vetëm 1 ditë para se tërmeti shkatërrimtar të godiste tokën.
E emocionuar nga gëzimi, Bilge Avci, bashkëshorja e Mustafasë, i dha në krahë vajzën 12-ditëshe.
Vetëm 24 orë para se të binte tërmeti, çifti ndodhej në një spital në Antakya, ku pritej lindja.
Lindja ndodhi në 23:50 me orën lokale më 5 shkurt. Disa orë më vonë, goditi tërmeti i parë, gjatë të cilit mbeti nën rrënoja Mustafa Avcı.
Fatmirësisht, reparti i spitalit ku ndodhej Bilge Avcı bashkë me foshnjën e sapolindur, qëndroi pa u rrëzuar për një kohë, mjaftueshëm që ata të dalin të sigurt nga spitali.
Mbrëmë, 261 orë pas tërmetit shkatërrues, Mustafai u nxor i gjallë nga rrënojat, ngjarje e cila cilësohet si mrekulli. Ai u transferua në një spital në qytetin Mersin, ku e vizituan bashkëshortja Bilge dhe foshnja e tyre.
Duke menduar se familja e tij kishte vdekur, Mustafa Avcı tha se nuk kishte asnjë shpresë dhe madje nuk bëri asnjë përpjekje për të dalë i gjallë nga rrënojat.
I pyetur se si ndihet tani, Mustafa Avcı tha: Është sikur kam lindur sërish.
Bilge Avcı shprehet se ende nuk mund ta besojë që burri i saj është nxjerrë i gjallë nga rrënojat.
“Jam shumë e lumtur. Kishim humbur shpresat. Tani jemi në një pikë ku fjalët nuk mjaftojnë. Vajza ime ishte gjithmonë e buzëqeshur, sikur po thoshte ‘Babai im do të vijë sot’“, tha Bilge Avcı.
