Kush thotë që transferimet në dimër, nuk janë momenti ideal për të shitur/blerë futbollistë?
Këtë herë Premier League ka thyer sërisht ‘rekordin’, për shpenzimet bruto të klubeve. Nuk jemi duke folur për një shumë të vogël por për plot 815 milionë sterlina, shpenzime këto të bëra vetëm gjatë muajt janar, 90% më shumë krahasuar me rekordin e mëparshëm prej 430 milionë sterlinash në 2018-n dhe thuajse trefishi krahasuar me merkaton e janarit një vit më parë.
Sipas grupit të biznesit sportiv të Deloitte, klubet e Premier League kanë vendosur një rekord të ri në lidhje me shpenzimet neto të transferimeve gjatë merkatos së janarit – në 720 milionë sterlina, duke eklipsuar rekordin e mëparshëm në janar 2022. (180 milionë sterlina).
Nëse i bashkojmë me shpenzimet rekord në merkaton e transferimeve në verë(1.9 miliardë sterlina), arrijmë në përfundimit se klubet e Premier League kanë shpenzuar në total 2.8 miliardë sterlina në sezon.
Shpenzimi prej 275 milionë sterlinash në “Deadline Day” nga klubet e Premier League përfaqëson një rekord të ri për merkaton e janarit, ndërsa klubet e Premier League përfaqësojnë 79% të shpenzimeve totale të “Big 5” në futbollin europian, duke shënuar përqindjen më të lartë të regjistruar ndonjëherë.
Gjashtë klubet e para të Premier League gjeneruan të ardhura të cilat përfaqësojnë 54% të shpenzimeve totale bruto për transferime në kampionat, ku vetëm Chelsea zë 37% të shpenzimeve totale të kampionatit.
“Shpenzimet rekord nga klubet e Premier League këtë sezon shkojnë përtej asaj që kemi parë deri më tani” – deklaroi Tim Bridge, partner kryesor i Sports Business Group në Deloitte.
Chelsea theu rekord në Premier League angleze, pasi arriti një marrëveshje prej 121 milionë eurosh (107 milionë sterlina) për mesfushorin e Benfica, Enzo Fernandez, fitues i Kupës së Botës me Argjentinën.
Fernandez është blerja e tetë e Chelsea në merkaton e janarit, pasi klubi londinez ka nënshkruar marrëveshje me Mykhailo Mudryk, Benoit Badiashile, Noni Madueke, Andrey Santos, David Fofana dhe Malo Gusto, ndërsa Joao Felix është marrë në huazim nga Atletico Madrid.
Shpenzimet e Serie A janë më të ulëtat që nga viti 2006
Ndryshe nga Premier League angleze, në Itali merkato e transferimeve të janarit kishte shpenzimet më të ulëta të klubeve të Seria A.
Klubet e Seria A shpenzuan në total 28,42 milionë euro për transferimet në janar, shifra më e ulët që nga viti 2006. Fiorentina është klubi që ka shpenzuar më shumë, për një lojtar që ishte pjesë e klubit.
Futbolli italian është duke u rimëkëmbur financiarisht nga pandemia e koronavisurit, por vitin e kaluar, klubet e Seria A kanë shpenzuar 185 milionë euro (201 milionë dollarë).
Katër klubet e para: Napoli, Inter, Lazio dhe Atalanta nuk kanë shpenzuar asnjë euro këtë muaj.
