Fotaq Zaharia, i dënuari i njohur si “I forti i Vlorës”, ka ndërruar jetë në orët e para të mëngjesit të sotëm në Reanimacionin e QSUT. Zaharia, i cili po vuante një dënim prej 25 vitesh për vrasje, ishte shtruar në spital me insuficiencë respiratore dhe po trajtohej që prej 16 gushtit 2024.
Fotaq Zaharia fitoi në vitin 2022 një betejë të rëndësishme ligjore kundër Shtetit Shqiptar në Gjykatën e Strasburgut. Zaharia, i cili ishte i privuar nga shërbimet mjekësore të nevojshme në burg, duke përfshirë një operacion urgjent në këmbë, fitoi një dëmshpërblimin prej 13 mijë eurosh për dëmet pasurore dhe jopasurore, si dhe 2 mijë euro të tjera për kostot dhe shpenzimet gjyqësore.
“I forti” i Vlorës u plagos në këmbë nga Policia, para vitit 2010 kur u arrestua, dhe atëherë i është nënshtruar një operacioni për vendosjen e një pllake metalike. Mirëpo, vite më pas Fotaq Zaharia ka kërkuar të futet në operacion të dytë sepse pllaka po i konsumonte kockën.
Pavarësisht se Gjykata ka urdhëruar futjen në operacion, i dënuari nuk ka mundur dot të bëjë ndërhyrjen. Prandaj iu drejtua Gjykatës së Strasburgut dhe fitoi, duke marrë pas dhe një dëmshpërblim.
