Kontrolli i Lartë i Shtetit ka kryer një auditim të thelluar për sistemin e menaxhimit të gjobave rrugore njohur si e-gjoba.
Pas auditimit për dy vitet e fundit për kontratën nga autoriteti kontraktor AKSH dhe departamenti për teknologjinë e Informacionit, Kontrolli i Lartë i Shtetit ka kërkuar ndërhyrje sa më të shpejta për funksionimin e sistemit të gjobës elektronike.
KLSH ka vërejtur një mospërputhje mes kohës reale kur një efektiv policie vendos gjobën mbi kundravajtjen pasi qytetari njoftohet jo sipas orës dhe datës së shkeljes, por sipas çastit kur gjoba është rregjistruar në sistem.
Kjo ka bërë që qindra qytetarë t’i drejtohen gjykatës duke këmbëngulur se nuk kanë kryer shkelje sipas të dhënave të njoftuara.
Një problem tjetër i konstatuar nga KLSH është mungesa e backup, mungesa e ndërveprimit mes insitutucioneve si edhe mos njoftimi I qytetarëve edhe përmes postës kur i vendoset gjoba në mungesë. Fotografimi i shkeljes nga ana e oficerit të policisë konsiderohet një veprim i paplotë që e kthen qytetarin shkelës të painformuar përsa kohë nuk i dërgohet në e-Albania.
KLSH thekson se Mungesa e bashkëpunimit dhe bashkërendimi midis Drejtorisë së Policisë Rrugore dhe DTI për ndjekjen e kontratës cenon funksionalitetin në përdorimin e sistemit “e-gjoba’.
Për gjetjet KLSH shton se mungesa e pajisjeve inteligjente në përmbushje të kontratës rrit rrezikun e gjobave të pasakta në sistem. Gjithashtu KLSH gjatë intervistave me disa agjentë të policisë rrugore ka zbuluar se dhe radiot e komunikimit ata i sigurojnë në mënyrë individuale pasi nuk ka patur gjendje. Por ky element cënon sigurinë në komunikimin ndërmjet tyre pasi radiot që shiten në treg jo gjithmonë i plotësojnë kriteret e nevojshme për të qenë të sigurta deklarohet në auditim.
Për pajisjet alkool-matëse, agjentët thonë se ato nuk japin të dhëna të afërta me sa konstatohet një drejtues mjeti gjatë kontrollit.
KLSH ka ngritur edhe problemin e mungesës së një sistemi për të bërë efektive gjobat ndaj mjeteve me targa të huaja, apo njoftimin në kohë në kufi të masave administrative ndaj shkelësve të kodit rrugor.
