Kryetari i KQZ, Ilirjan Celibashi ka dalë në një deklaratë në lidhje me procesin e zgjedhjeve për kryebashkiakun e Himarës ku kandidatët janë Vangjel Tavo i Partisë Socialiste dhe Petro Gjikuria i opozitës.
Celibashi deklaron se procesi i votimit po shkon normalisht, me disa incidente të vogla, por që po merren masa dhe janë kthyer në normalitet.
Ndërsa sa i përket problemit me vlefshmërinë e kartave të ID, Celibashi shprehet se e para është një proces që mbetet jashtë procesit zgjedhor në themelin e vetë. Dhe e dyta sipas komisionerit shtetëror janë qytetarët që duhet të interesohen në lidhje me skadencën e kartës së ID dhe më pas edhe partitë politike.
I pyetur në lidhje me një vendim nga Këshilli I Ministrave dhe Ministria e Brendshme për shtyrjen e afatit të dokumentit të identifikimit, Celibashi tha se nuk ka një përgjigje se përse nuk u mor një vendim i tillë.
“Nga informacionet e KQZ me ecurinë e procesit zgjedhor po shkon normalisht. Çështja objekt i diskutimit është vlefshmërisë e kartave të ID, por si e thamë më herët kjo nuk ka të bëjë me KQZ, por është një proces që mbetet jashtë procesit zgjedhor në themelin e vetë.
Janë 6 mijë votues që ID u ka skaduar, po e njëjta ka qenë edhe në zgjedhjet e kaluara. Përse për këto zgjedhje nuk u mor vendim nga Këshilli i Ministrave për zgjatjen e vlefshmërisë, nuk mund ta them. Çështje jashtë sferës së KQZ.
Ne nuk kemi pasur komunikim sot me përfaqësues të Qeverisë apo Ministrisë së Brendshme, duhet të ishte zgjidhur më parë. Lidhet me interesin e votuesve, ata e vlërësojnë vëtë nëse kanë interes për të pasur një ID. Dhe e dyta është për partitë politike, që nuk janë të inteëresuara. Është interes që lidhet me votuesit dhe kandidatët.
Procesi ka shkuar qetë, me disa problematika. Një qendër votimi ka pasur persona të paautorizuar të cilët mbanin shënim kush hynte dhe dilte. Edhe një incident është regjistruar në Lukovë me mediat që nuk janë lejuar të filmonin. Tek ne lejohet që media të filmojë në qendrat e votimit. Kush nuk e pranon këtë duhet të lerë detyrën. Ata do kenë pasoja nga sjellja e tyre.
Komunikimi duhet të jetë vetëm në gjuhën shqipe, komunikimi zyrtar, por nëse dikush do të flasë gjuhë të huaj, mund ta bëjë edhe këtë.”
Sa i përket rezultatit dhe procesit të numërimit, Celibashi deklaroi se në orët e para të mëngjesit mund të dalin rezultatet.
