Fermerët e Maliqit kanë dalë në protestë ditën e sotme për shkak të prodhimeve bujqësore që u kanë mbetur pa shitur.
Ata janë mbledhur në afërsi të fshatit Drithas në rrugën hyrëse me mjetet e tyre me qëllim bllokimin e rrugës. Por ky bllokim është shoqëruar me tension dhe përplasje me policinë.
Produktet si qepa, patatja, misri dhe gruri iu kanë mbetur stok për shkak të mungesës së kërkesës dhe tregut për t’i shitur.
Fermerët thonë se mungesa e subvencioneve ka rritur koston e prodhimit dhe pa mbështetje financiare, prodhimi i tyre bëhet më i shtrenjtë dhe vështirë për t’u shitur.
Ndërkohë që konkurrenca nga importet është një tjetër problem pasi prodhimet bujqësore të importuara kanë çmime më të ulëta dhe konkurrojnë me prodhimet vendase, duke e bërë më të vështirë për fermerët lokalë që të shesin produktet e tyre.
Fermerët kërkojnë mbështetje nga qeveria për të subvencionuar kostot e prodhimit, në mënyrë që të mund të konkurrojnë me prodhimet e importuara. Krijimi dhe promovimi i tregjeve lokale për prodhimet e tyre do të ndihmonte në zgjidhjen e problemit të stoqeve të pa shitura. Rregullimi i importeve për të siguruar që ato të mos dëmtojnë prodhimin vendas dhe të jenë në përputhje me standardet, është një tjetër kërkesë e fermerëve.
