Nga viti në vit numri i lindjeve në Shqipëri është në rënie, por shqetësues është fakti se edhe treguesi i vdekshmërisë foshnjore mbetet i lartë.
Të dhënat zyrtare nga INSTAT tregojnë se në vitin 2023, në 1000 lindje të gjalla humbën jetën 6.1 foshnja, nga 6.5 në vitin 2022.
Në bazë të këtyre rezultateve, Shqipëria ka vdekshmërinë foshnjore dy herë më të lartë se mesatarja europiane më 2022, me 3 vdekje në 1000 lindje të gjalla. Ndërsa me të dhënat e vitit 2023, vendi ynë renditet i dyti për vdekshmërinë foshnjore më të lartë në Europë, pas Turqisë (9.2).
INSTAT raportoi se në vitin 2023, janë regjistruar 144 vdekje foshnjore, 52,1% janë neonatal i hershëm (0-6 ditësh), 18,0% neonatal i vonshëm (7 -27 ditësh) dhe 29,9% janë postneonatal (28-365 ditësh).
Ndër shkaqet kryesore të vdekshmërisë foshnjore përmenden “Sëmundjet që shfaqen në periudhën rreth lindjes” me 49,3%, “Sëmundje të aparatit të qarkullimit të gjakut” me 20,1% dhe “Anomali të bashkëlindura” me 9,7% të vdekjeve të regjistruara.
Sipas mjekëve, vdekshmëri e lartë foshnjore në Shqipëri ndodh edhe për shkak të mungesës së mjekëve neonatalë.
Neonatologjia është një degë e pediatrisë që trajton shëndetin e foshnjave në 28 ditët e para të jetës. Por duke pasur fokus specifik dhe për një periudhë të shkurtër jetën e bebes, mjekët pediatër nuk preferojnë të specializohen në këtë drejtim. Ata zgjedhin më tepër pediatrinë e përgjithshme pasi iu siguron punë për fëmijë deri në 14 vjeç, ndryshe nga neonatologët të cilët duhet të specifikohen për bebet njëmuajshe.
