SPAK po kërkon ndihmën e ndërkombëtareve lidhur me çështjen e Aben Ahmetajt. Ky informacion vjen në një kohë kur ndaj ish-zëvendës kryeministri Arben Ahmetaj vazhdon të jetë në fuqi një mandat arresti që bazohet tek një masë sigurie shpallur nga Gjykata Antikorrupsion. Sipas Top Channel, ministria e drejtësisë konfirmon se ka deleguar tre letërporosi dhe konkretisht drejt Hungarisë, Suedisë dhe Vjenës dhe diçka e tillë konfirmon hetimin për pastrim parash ndaj Ahmetajt.
Ky veprim vjen në kohën kur është pezulluar gjykimi për privatizimin e shoqërisë ‘Buka’, për të cilën kundër Ahmetajt SPAK ka zyrtarizuar akuzën e shpërdorimit të detyrës. Pezullimi i gjykimit ndaj tij do të zgjasë një vit me detyra të lëna nga Gjykata Antikorrupsion për ta gjetur.
Ahmetaj akuzohet në këtë dosje për një firmë të lëshuar gjatë 2014 e cila i hapi rrugën privatizimit të shoqërisë përmes ankandit të aksioneve shtetërore. Ai po hetohet edhe në çështjen e inceneratorëve, korrupsion, fshehje pasurie dhe pastrim parash.
